Kiwanda cha silaha chagundulika Morogoro

Kiwanda bubu cha kutengeneza silaha za aina mbalimbali ikiwemo bunduki aina ya gobore na bastola, kimebainika kuwepo kati kati ya mji wa Morogoro, katika eneo la kwa Mavumila.

Eneo hilo ni maarufu kwa utengenezaji wa funguo, ambapo watu kadhaa wamekamatwa na wanahojiwa na polisi kutokana na tukio hilo.

Waandishi wa habari waliofika eneo la tukio, walishuhudia ulinzi mkali ukiwa umeimarishwa eneo la Masika, mtaa wa Kingo, kwenye nyumba ya marehemu Mavumila, ambayo imekuwa maarufu kutokana na matengenezo ya funguo.

Polisi kwa kushirikiana na kikosi cha kuzuia ujangili, idara ya wanyamapori, wamegundua kiwanda bubu cha kutengeneza silaha, na kukuta mitambo, malighafi na silaha zilizokamilika ikiwemo bunduki kadhaa zilizokamilika na ambazo zilikuwa bado katika matengenezo, kwenye nyumba hiyo.

Mwenyekiti wa Mtaa wa Kingo, Mwajuma Ndege, aliyekutwa eneo la tukio, alieleza kushangazwa na hali hiyo, ingawa alikiri miaka ya nyuma eneo hilo lilitumika kwa matengenezo ya funguo, sambamba na kusafisha magobore.

Ndege alisema suala la kuwepo kwa kiwanda hicho bubu huku majirani wakiwa hawafahamu, ni hatari kwa hali ya kiusalama, na kwamba hata yeye kama kiongozi wa mtaa, hakudhani kama kuna kiwanda kilichosheheni mitambo na malighafi za hatari namna hiyo.

Naye Ernest Mhando, mkazi wa Morogoro, alisema kiwanda hicho ni cha muda mrefu, na kimekuwa kikitumiwa kwa matengenezo ya funguo hivyo, lakini ili kuhakikisha usalama wa watanzania ni vyema wanaohusika na usajili wa viwanda wakaweka wazi iwapo kina uhalali wa kutengeneza silaha.

Watuhumiwa kadhaa wameweza kutiwa mbaroni katika tukio hilo, ingawa kamanda wa Polisi mkoa wa Morogoro Faustine Shilogile, aliahidi kukutana na waandishi wa habari siku ya Jumapili, kwaajili ya kutolea ufafanuzi kuhusiana na kiwanda hicho bubu cha silaha.

CHANZO: NIPASHE JUMAPILI